شنو هو ال VPS وليش كل مبرمج لازم يجرب انو ينصب واحد

هاي المقاله كتبتها للمبرمجين او مهندسي البرمجيات الي يريدون يعرفون شلون الانظمه تشتغل !! الانظمه الحقيقه الي تشتغل اونلاين ومرفوعه على سيرفرات. اغلب المبرمجين يمكن اكثريتهم ابدا ما متعاملين ويه سيرفرات حقيقيه ! يكتبون كود ويرفعوا على منصات تسويلهم هوستنك وميدرون شديصير. من تنظم سيرفر وحدك وترفع عليه موقع راح تعرف شلون وشيصير خطوه بخطوه من الالف للياء.

هاي المقاله حتكون جزء من سلسله حول ال VPS.

ليش كل مبرمج لازم يحوي سيرفر خاص او Virtual Server

• أغلب المبرمجين يكتبون كود ممتاز، بس من يجي وقت النشر يعتمدون على منصات جاهزة مثل Vercel أو Netlify أو Hosting جاهز، بدون ما يعرفون شنو يصير ورا الكواليس.
• خل نحجي بكل صراحه كل مبرمج ببدايه او حتى باول 3 سنواته يبقى يبرمج بشكل خاص على حاسبته ويشغل الموقع او النظام على حاسبه بين قوسين localhost وحتى لو جان يريد يرفع الموقع مالته او النظام, فيرفعه على منصات وميدري هاي المنصات شلون تخلي موقعه اونلاين وشديصير وره الكواليس 😅
• من ترفع موقعك اونلاين او اي نظام على منصات خارجيه, همه بكل سهوله ياخذون المشروع مالتك والكود الكامل ويدوخون بكل التفاصيل على سيرفراتهم, وهمه يكونون مسؤلين على تنظيم هاي السيرفرات من الصفر, يعني شلون يحموها, وشلون يخلوها متوفره اونلاين 24 ساعه وبشكل مستمر, وشلون يحموها من اي اختراقات ! تخيل هنا عزيزي انك تمر بكل هاي التفاصيل وبنفسك تنفذها !
• راح يجيك يوم من الايام تتسائل وتكول شلون تشتغل هاي السيرفرات ! وشلون اكدر اسوي هيج ؟ شديصير بالكواليس !
• تنصيب VPS من الصفر يعلمك شلون الانظمه بشكل حقيفي تنرفع بالسيرفرات وشلون الشركات الجبيره تنظم انظمتها ومواقعها وترفعها وتخليها اونلاين ! ومن حتقدم على شركه حتعرف شيصير ميصير.......

شنو هو ال VPS (بشكل مبسط وسهل)

• ال VPS او ال Virtual Private Server هو سيرفر افتراضي يشتغل على سيرفر حقيقي قوي, بس يكون مقسم الى اكثر من سيرفر صغير, وكل واحد يشتغل وحده !
• خل ابسطها الك, تخيل عماره (بنايه) جبيره (السيرفر الرئيسي الي يكون مثل الحاسبه) وبداخلها هواي شقق وكل شقه الها عدد غرف معين ومساحه ومعينه (الشقه الوحده هيه ال VPS)
• يعني من يكون عندك VPS خاص بيك ف انت عندك نظام تشغيل خاص بيك (غاليا Linux) و IP خاص بيك وتحكم كامل بالسيرفر وتكدر تنصب اي شي تريده !
• ال VPS كأنما كمبيوتر خاص بيك بس موجود على الانترنيت 24 ساعه وتكدر تتصيل بي بأي وقت وبأي مكان !

ليش كل مبرمج او مهندس برمجيات لازم يجرب ينصب سيرفر افتراضي VPS !

من تنصب VPS من الصفر حتمر بخطوات مهمه مثل:

• اختيار مزود السيرفر, بين قوسين تختار فد منصه تشتري او تأجر منها السيرفر طبعا Google و Digital ocean و Microsoft و Amazon وغيرهم يوفرون هيج سيرفرات !
• تنصيب نظام التشغيل
• الدخول للنظام اونلاين من اي مكان واي وقت عن طريق SSH
• انشاء يوزريه وتعيين permissions و roles لكل واحد بيهم
• تنصيب Web Server
• مراقبتك للسيرفر وللرام والمعالج والاداء مال سيرفر.

هاي التجربه ما تتعلمها من كورس او من فيديو واحد, تتعلمها من الغلطات وتجارب البحث. وهذا يعتبر احسن نوع تعلم !

ال VPS كأداة لاحتراف الامن السيبراني والكود الامن !

ال VPS يعتبر فد مكان تحتبر عليه كل سوالف الاختراق والامن عليه ! اي نعم, ومتخاف يصير عليه شي, بالنهايه هو مو حاسبه حقيقيه ومالتك ! وانما عباره عن Virtual machine يعني اله افتراضيه ! مرفوع اونلاين وتكدر ترسته من الصفر بحال حصول شي ! ال VPS من خلاله تكدر:

• تنشر تطبيق بي ثغرات.
• تشوف الهجمات شلون تصير.
• تطبيق حمايه حقيقيه.
• شلون تصير الهجمات وشلون الاعدادات الغلط تسبب مشاكل ! وشلون تحمي السيرفر والتطبيق سوا !

وطبعا هذا الشي مهم جدا اذا جنت تريد تتعلم Cybersecurity او AppSec او DevSecOps !

الخلاصه

ال VPS مو بس مكان تنشر عليه مشروعك, هو اداه تعلم, تغير طريقه تفكيرك كمبرمج, اذا جنت تريد تطور نفسك:

• تقنيا
• امنيا
• وكمهندس انظمه او مبرمج

ف تشغيل VPS خاص بيك هو احد من احسن القرارت الي تكدر تسويها وكل ما من وقت كل ما احسن !