كيف يعمل ال VPS (شلون يشتغل) (ال Hypervisor) ؟ نظره ما وراء الكواليس

من الناس تسمع “VPS” رأسا تفكر ب

“تكول هو عباره عن سيرفر بال cloud”

صح هذا الحجي, بس ناقصه هواي شرح !!!

ما وراء الكواليس, ال VPS عباره عن هادروير و سوفتوير او نظام مسؤل عن يكون هذا شي افتراضي ومتوفر بالانترنيت وعباره عن عزل مصادر وقوه الحاسبه كل ذني يجتمعن حتى يكونون ال VPS.

بهاي المقاله راح اشرح شلون يشتغل فعليا ال VPS وشلون تكون !!!

1. السيرفر الحقيقي (المسؤل عن اللعبه كلها)

الموضوع كله يبدي بسيرفر رئيسي بال data center بمعنى الاخر بمكان يتوفر بي السيرفر.

هذا السيرفر كلش قوي ويحتوي على:

1. معالجات كلش قويه (CPUs)
2. كميه جبيره من ال RAM
3. سعه تخزين سريعه وجبيره SSD / NVMe
4. كارتات انترنيت او شبكه كلش قويه حتى توفر وتستقبل انترنيت بشكل سريع.

هسه السيرفر هذا وحده ممكن يشتغل ويصير فد شي كلش قوي !! ويشغل نظام واحد ! بس هيج دنضيع فرصه كلش قويه وجبيره, وممكن نستغل هاي القوه عن طريق تقسيمها والاستفاده منها ! يعني تخيل عندك حاسبه قويه تكدر تقسمها ال 6 حاسبات ! وهنا يجي دور ال Hypervisor الي هو عباره عن نظام مسؤل عن هذا الشي

2. ال Hypervisor (المسؤل عن تقسيم السيرفر ال مجموعه VPSs)

لازم نشرح ونفتهم شنو ال Hypervisor, ال Hypervisor هو عباره عن نظام يتنصب بشكل مباشر على السيرفر ! ,ويكون مسؤل عن تقسيم السيرفر الى عده سيرفرات من اشهر انواع ال Hypervisor:

• اولا: KVM
• ثانيا: VMware ESXI
• ثالثا: Hyper-V
• رابعا: Xen

وظيفه ال Hypervisor:

• تقسيم السيرفر الرئيسي الى عده virtual machines (الاات افتراضيه)
• تقسيم وتوزيع CPU, RAM, ومساحه تخزين لكل واحد منهم
• فرض ووضع قوانين انو كل واحد يكون مفصول عن الاخر

3. السيرفر الافتراضي (ال VPS)

كل سيرفر افتراضي VPS هو Virtual Machine تم صنعها عن طريق ال Hypervisor

كل VPS عنده:

1. ال CPU الخاص بي.
2. ال RAM الخاص بي.
3. الهادر والمساحه الخاصه بي.
4. كارت الشبكه الافتراضي الخاص بي.
5. نظام التشغيل الخاص بي (وندوز او لنكس…)

من داخل ال VPS انت:

• تشوف بس مواصفاتك الخاصه
• عندك وصول بصفه ادمن للنظام
• ما تكدر تشوف اي VPS لاخ مصنوع عن طريق ال Server

هذا العزل والتوزيع كله يعود الفضل لل Hypervisor

4. عزل مواصفات السيرفر والمصادر (ليش الجيران ما يأثرون بيك)

الفرق الجبير بين VPS وال Shared hosting هو المصادر مال حاسبه والمواصفات تكون مفصوله !!

ال Hypervisor يتأكد انو:

• قوه ال CPU تكون محدوده ومتوزعه
• ال RAM نسبه منه محجوزه لل VPS
• مصادر الادخال والاخراج I/O مسيطر عليها.
• اذا واحد من ال VPSs عطل ما يأثر على الاخرين !

ولذلك دائما يكون اداء ال VPS:

• اكثر استقرار
• تتوقعه اكثر
• مناسب اكثر للانظمه والتطبيقات

5. الشبكات (شلون ال VPS يوصله الانترنيت ؟ )

كل VPS يحصل كارت تعريف (خل نسمي) خاص بي ويكون افتراضي واسمه virtual network interface.

الي يحصل ما وراء الكواليس هو كالاتي:

1. اتصالك يوصل لمركز البيانات ال data center
2. وراها يتم ربطه بال Physical server او السيرفر الرئييسي.
3. ال Hypervisor حيكون مسؤول بتوصيله لل VPS الخاص الي تريد تتصل بي
4. ال OS الخاص بال VPS الي تريد تتصل بي حيستلم هذا الاتصال

انت ← ال Data center ← السيرفر الرئيسي ← ال Hypervisor ← ال VPS ← ال OS او نظام التشغيل يربطه بالبورت المناسب.

6. المساحه (افتراضيه لكن حقيقيه ! )

تخزين الـ VPS غالبًا يكون:

• دسك افتراضي، بس وراه هاردات حقيقية SSD أو NVMe
• أحيانًا يكون مكرّر حتى يصير أمان أكثر وما تضيع الداتا

من داخل الـ VPS مالتك:

• /dev/sda يبين وكأنه هارد حقيقي
• أنظمة الملفات تشتغل طبيعي بدون فرق
• الأداء يعتمد على بنية الشركة المزوّدة للسيرفر

هالتجريد (abstraction) يخليك تقدر:

• تسوي باك أب بسهولة
• تاخذ Snapshots بأي وقت
• تكبّر أو تصغّر مساحة التخزين حسب حاجتك

7. ليش مهم الك هذا الحجي كله كمبرمج او مهندس برمحيات ؟!

للمبرمجين او مهندسي البرمجيات او اي شخص تقني يعمل بمجال تطوير الانظمه, فهمه لل VPS يزوده او يزودك ب:

• شلون تكتشف نقاط الضعف وتصلحها من ناحيه الاداء بالسيرفر, لان حتفتهم شلون السيرفرات تشتغل وخاصه الافتراضيه
• شلون تختار المواصفات الصحيحه والقوه الصحيحه لل VPS الي تريده
• تأمن على سيرفراتك بشكل تام, لان حتعرف شلون كلشي مترابط وشلون يشتغل.
• التحويل منه الى Docker او Kubernetes او حتى ممكن بشكل تام تعتمد على ال Clouds

اذا تفهم شلون ال VPS يشتغل حتكوم ما تخاف من التعامل ويه ال Clouds او الخدمات السحابيه !

نبذه اخيره !

ال VPS مو بس سيرفر بال Clouds وانما:

• هاردوير حقيقي بمعنى او اخر
• افتراضيه وعزل حقيفي عن السيرفر الحقيقي
• نظام تشغيل كامل !

من تنصب VPS من الصفر حتكتسب هواي خبره منها شلون تتعامل ويه الانظمه والسيرفرات الجبيره في حال فد يوم واجهت هالشي او شلون ممكن ترفع تطبيقاتك الخاصه وو…